मुंबई : भारतीय चित्रपट सृष्टीत अवीट गोडीच्या संगीताने रसिकांच्या मनावर अधिराज्य गाजविणाऱ्या ज्येष्ठ संगीतकार उषा खन्ना यांना महाराष्ट्र शासनाकडून दिला जाणारा गानसम्राज्ञी लता मंगेशकर पुरस्कार जाहीर झाला आहे. राज्य सरकारच्या सांस्कृतिक कार्य विभागाने हा पुरस्कार जाहीर केला असून ५ लाख रुपये, मानपत्र, स्मृतिचिन्ह असे पुरस्काराचे स्वरुप आहे. सांस्कृतिक कार्य मंत्री विनोद तावडे यांच्या अध्यक्षतेखालील पुरस्कार निवड समितीने सन २०१९-२० साठीच्या गानसम्राज्ञी लता मंगेशकर पुरस्कारासाठी उषा खन्ना यांची निवड केली.
विनोद तावडे यांनी आज प्रसिध्दी पत्रक काढून ही घोषणा केली. उषा खन्ना या भारतीय चित्रपट सृष्टीतील मोजक्या महिला संगीतकारांपैकी असून, व्यावसायिकदृष्टया यशस्वी संगीतकार म्हणून ओळखल्या जातात. सन १९५९ मध्ये प्रदर्शित झालेल्या ‘दिल देके देखो’ या चित्रपटापासून त्यांनी आपल्या संगीत दिग्दर्शनाच्या कारकीर्दीला सुरुवात केली. त्यांच्या पहिल्याच चित्रपटातील संगीत खूप गाजले. त्यानंतर बिन फेरे हम तेरे, लाल बंगला, सबक, हवस, हम हिंदुस्थानी, आप तो एैसे ना थे, साजन बिना सुहागन, साजन की सहेली, अनोखा बंधन, शबनम, सौतन, आओ प्यार करे, यासारख्या अनेक चित्रपटांना त्यांनी संगीत दिले व ते खूप गाजले. त्यांनी काही मालिकांसाठीही संगीत दिग्दर्शन केले. त्यांनी संगीत दिलेली व गायिलेली भजने लोकप्रिय झाली. २००३ मध्ये प्रदर्शित झालेला ‘दिल परदेसी हो गया’ हा त्यांनी संगीत दिलेला शेवटचा चित्रपट. अनोख्या ठेक्यासाठी त्यांची गाणी आजही ओळखली जातात.
