टीम AM : मराठी अभिनेत्री, लेखिका प्रिया तेंडुलकर यांचा आज स्मृतीदिन आहे. त्यांचा जन्म. 19 ऑक्टोबर 1954 ला झाला होता. प्रिया तेंडुलकरांनी आपल्या कारकिर्दीची सुरुवात एका पंचतारांकित हॉटेलमध्ये वेट्रेसची नोकरी करून केली. ती नोकरी सोडून देऊन त्या नाट्यसृष्टीमध्ये शिरल्या. त्यांनी गिधाडे, ती फुलराणी, एक हट्टी मुलगी या नाटकांमध्ये काम केले होते.
प्रिया तेंडुलकरांचा पहिला चित्रपट इ. स. 1973 साली आलेला दिग्दर्शक शाम बेनेगल यांचा ‘अंकुर’ हा हिंदी चित्रपट. यांव्यतिरिक्त त्यांनी ‘गोंधळात गोंधळ’, ‘धाकटी जाऊ’ आणि ‘तूच माझी राणी’ यासारख्या मराठी चित्रपटांमध्येही काम केले होते.
प्रिया तेंडुलकर ह्या भारतातील पहिल्या टीव्ही – स्टार म्हणून ओळखल्या जातात. त्यांची ‘रजनी’ ही मालिका खूपच गाजली. त्यांच्या इतर मालिकांमध्ये ‘प्रिया तेंडुलकर शो’, ‘जिम्मेनदार कौन’, ‘किस्से मियाँ बीवी के’, ‘हम पांच’ या हिंदी तर ‘दामिनी’ या मराठी मालिकेचा समावेश होतो. त्या लेखिकाही होत्या. त्यांनी अनेक लघुकथा लिहिल्या आहेत. त्यांचे ‘ज्याचा त्याचा प्रश्न’ हे पुस्तक प्रसिद्ध आहे. नाटककार विजय तेंडुलकर हे त्यांचे वडील. प्रिया तेंडुलकर यांचे 19 सप्टेंबर 2002 रोजी निधन झाले. प्रिया तेंडुलकर यांना विनम्र अभिवादन.
शब्दांकन : संजीव वेलणकर
