टीम AM : राज्य मंत्रिमंडळाच्या आज झालेल्या बैठकीत प्रशासन, आरोग्य, ग्रामविकास आणि नगरविकासाशी संबंधित महत्त्वाचे व दूरगामी निर्णय घेण्यात आले. ग्राम, तालुका व जिल्हा पातळीवरील प्रशासन अधिक सक्षम करण्यावर भर देतानाच नगरपरिषदांच्या रचनेतही ऐतिहासिक बदल करण्याचा निर्णय मंत्रिमंडळाने घेतला आहे.
ग्राम, तालुका व जिल्हा प्रशासनासाठी ‘जिल्हा कर्मयोगी 2.0’
ग्राम, तालुका आणि जिल्हा प्रशासन अधिक कार्यक्षम व सक्षम करण्यासाठी ‘जिल्हा कर्मयोगी 2.0’ आणि ‘सरपंच संवाद’ कार्यक्रम राबवण्यास मंत्रिमंडळाने मंजुरी दिली आहे.
सामान्य प्रशासन विभागामार्फत हा उपक्रम राबवला जाणार असून, यामुळे प्रशासकीय अधिकारी व लोकप्रतिनिधींमध्ये थेट संवाद वाढून लोकाभिमुख प्रशासनाला चालना मिळणार आहे.
आरोग्य सेविकांना दिलासा : नियुक्त्या नियमित होणार
राज्यातील जिल्हा परिषदांतर्गत आरोग्य विभागात कार्यरत तसेच सेवानिवृत्त झालेल्या बंधपत्रित आरोग्य सेविकांच्या नियुक्त्या नियमित करण्याचा निर्णय घेण्यात आला आहे.
ग्रामविकास व पंचायत राज विभागाच्या या निर्णयामुळे अनेक वर्षांपासून प्रलंबित असलेला प्रश्न मार्गी लागला असून, आरोग्य सेविकांना मोठा दिलासा मिळणार आहे.
धाराशिवमध्ये अण्णाभाऊ साठेंचा पुतळा उभारणार
धाराशिव शहरात साहित्य सम्राट लोकशाहीर अण्णाभाऊ साठे यांचा भव्य पुतळा उभारण्यासाठी महसूल विभागाने निर्णय घेतला आहे.
यासाठी दुग्धव्यवसाय विकास विभागाची एक एकर जागा उपलब्ध करून देण्यास मंजुरी देण्यात आली आहे. या निर्णयामुळे सामाजिक आणि साहित्यिक वारशाला मान दिला गेला आहे.
नगरपरिषद कायद्यात मोठी सुधारणा; थेट निवडून आलेल्या अध्यक्षांना अधिकार
महाराष्ट्र नगरपरिषदा, नगरपंचायती व औद्योगिक नगरी अधिनियम, 1965 मध्ये महत्त्वपूर्ण सुधारणा करण्याचा निर्णय मंत्रिमंडळ बैठकीत घेण्यात आला.
- नगरपरिषदा व नगरपंचायतींचे थेट निवडून आलेले अध्यक्ष सदस्य ठरतील
- त्यांना मतदानाचा अधिकारही मिळणार
- या सुधारणेसाठी अध्यादेश काढण्यास मंत्रिमंडळाची मंजुरी
नगरविकास विभागाच्या या निर्णयामुळे नगरपरिषदांमधील अध्यक्षांची भूमिका अधिक बळकट होणार असून, स्थिर व सक्षम स्थानिक स्वराज्य संस्थांना चालना मिळणार असल्याचे सांगितले जात आहे.
