टीम AM : अंबाजोगाई – लातूर महामार्गावर अपघाताची घटना आज दुपारच्या सुमारास घडली आहे. अज्ञात वाहनाच्या धडकेत युवकाचा जागीच मृत्यू झाला असून अन्य एक जण गंभीर जखमी झाला आहे. जखमीला अधिक उपचारासाठी ‘स्वाराती’ रुग्णालयात दाखल करण्यात आले आहे. सेलूअंबा टोलनाक्यावर ही अपघाताची घटना घडली आहे.
या बाबत प्राप्त माहिती अशी की, अंबाजोगाई शहरातील रमाबाई आंबेडकर चौकाजवळील वसाहतीमध्ये राहणारा रणजित बालाजी चिकटे [वय – 25] हा युवक आपल्या मित्रासह एमएच – 25 एए 8882 या दुचाकीहून अंबाजोगाई – लातूर रस्त्यावरुन जात असताना सेलूअंबा टोलनाक्यावर त्याच्या दुचाकीला भरधाव अज्ञात वाहनाने जोराची धडक दिली. या धडकेत रणजित चिकटे याचा जागीच मृत्यू झाला तर दुचाकीवरील मित्र गंभीर जखमी झाला आहे. दरम्यान, या घटनेमुळे परिसरात हळहळ व्यक्त करण्यात येत आहे. या घटनेचा अधिक तपास पोलीस करीत आहेत.
