टीम AM : भारतीय राज्यघटनेचे शिल्पकार डॉ. बाबासाहेब आंबेडकर यांच्या जगातील सर्वात उंच पुतळ्याचे अनावरण दिनांक 19 जानेवारीला आंध्र प्रदेशचे मुख्यमंत्री वाय.एस. जगन मोहन रेड्डी यांच्या हस्ते करण्यात आले.
विजयवाडा येथे मोठ्या दिमाखात हा पुतळा उभारण्यात आला असून या पुतळ्याला ‘स्टॅच्यू ऑफ सोशल जस्टीस’ असे नाव देण्यात आले आहे. या पुतळ्याची उंची जमिनीपासून 206 फूट आहे. यापूर्वी तेलंगणामध्ये असलेला डॉ. आंबेडकरांचा 175 फुटांचा पुतळा सर्वात उंच मानला जात होता. विजयवाडा येथे आमच्या सरकारने उभारलेले आंबेडकरांचे 206 फुटांचे महाशिल्प हे केवळ राज्याचेच नव्हे तर देशाचेही प्रतीक आहे, असे आंध्र प्रदेशचे मुख्यमंत्री वायएस जगन मोहन रेड्डी यांनी म्हटले आहे.
पुतळ्याच्या जागी स्वराज मैदानासह पुतळ्याच्या परिसराचा पुनर्विकास करण्यात आला. कॅम्पसमधील जलकुंभ आणि इतर सुविधांचीही काळजी घेण्यात आली आहे. याशिवाय संगीतमय पाण्याचे कारंजेही येथे बांधण्यात आले आहेत. डॉ. आंबेडकरांचा जीवनपट दाखवण्यासाठी एलईडी स्क्रीन लावण्यात आल्या आहेत. 2 हजार लोकांच्या आसनक्षमतेचे कॉन्फरन्स सेंटर आणि 8 हजार स्क्वेअर फुटांचे फूड कोर्ट आणि मुलांचे खेळाचे क्षेत्रदेखील येथे बांधण्यात आले आहे. डॉ. आंबेडकरांचा देशाबाहेरचा सर्वात मोठा पुतळा अमेरिकेतील वॉशिंग्टन येथे आहे. गेल्या वर्षी 2023 मध्ये त्याचे अनावरण करण्यात आले, ज्याला ‘स्टॅच्यू ऑफ इक्वॅलिटी’ असे नाव देण्यात आले. हा पुतळा 19 फूट उंच असून शिल्पकार राम सुतार यांनी तयार केला आहे.
– अशी आहेत वैशिष्ट्ये
◾जगातील सर्वात उंचीचा डॉ. बाबासाहेब आंबेडकर यांचा पुतळा. 125 फूट उंच आणि 81 फूट उंच चौथऱ्यावर दिमाखात उभा आहे.
◾पुतळा बनवण्यासाठी 404.35 कोटी रुपये खर्च करण्यात आले.
◾हिरव्यागार उद्यानात 18.81 एकरच्या कॅम्पसमध्ये वसलेला आहे.
◾कच्चा माल ते डिझायनिंगपर्यंत पुतळ्याचे बांधकाम पूर्णपणे ‘मेड इन इंडिया’ प्रकल्पा अंतर्गत केले गेले.
◾या पुतळ्यासाठी सुमारे 400 टन स्टील वापरले गेले.
◾20 जानेवारीपासून हा पुतळा सर्वांसाठी खुला होणार आहे.
