टीम AM : बॉलिवूड अभिनेत्री पूनम ढिल्लों यांच्या सौंदर्यावर एकेकाळी शेकडो तरुण भाळले होते. त्यांनी अनेक लोकप्रिय सिनेमांमध्ये काम करत प्रेक्षकांकडून वाहवा मिळवली. पूनम यांचा आज 62 वा वाढदिवस आहे. त्यांचा जन्म 18 एप्रिल 1962 साली उत्तर प्रदेशमधील कानपूर याठिकाणी झाला होता.
वयाच्या अवघ्या 16 व्या वर्षी बॉलिवूडमध्ये धमाकेदार पदार्पण केले. त्यांनी मिस इंडियाचा खिताबही जिंकला आहे. ‘त्रिशूल’, ‘नुरी’, ‘काला पत्थर’ अशा अनेक हिट चित्रपटात त्यांनी काम केलं आहे.
पूनम यांनी 1978 साली ‘मिस इंडिया यंग’ चा ताज जिंकला होता. यानंतर यश चोप्रा यांची नजर पूनम यांच्यावर पडली आणि त्यांनी तरुण पूनमला त्यांचा प्रसिद्ध चित्रपट ‘त्रिशूल’ मध्ये कास्ट केले. या चित्रपटात पूनम यांनी संजीव कुमार यांच्या मुलीची आणि शशी कपूर – अमिताभ बच्चन यांच्या बहिणीची भूमिका साकारली होती. यानंतर यश चोप्रांनी त्यांना फारुख शेख यांच्यासह ‘नुरी’ सिनेमात कास्ट केले. या सिनेमासाठी पूनम यांना ‘फिल्मफेअर’ पुरस्कार सोहळ्यात सर्वोत्कृष्ट अभिनेत्री या श्रेणीत नामांकन मिळाले होते.
किस्सा स्विमसूटचा…
‘त्रिशूल’ हा पूनम यांचा पहिला चित्रपट होता. पण या सिनेमातही त्यांनी वयाच्या अवघ्या 16 व्या वर्षी स्विमसूट परिधान करण्यास नकार दिला नाही. यानंतर पूनम इतर काही चित्रपटांमध्येही स्विमसूटमध्ये दिसली होती.
भारतात आणली ‘व्हॅनिटी व्हॅन’
पूनम यांच्याबद्दल एक किस्सा सांगितला जातो की, त्या एकदा त्यांचा मित्र आणि निर्माता जगमोहन मुद्रा यांना भेटण्यासाठी लॉस एंजेलिसमध्ये गेल्या होत्या. त्याठिकाणी त्यांनी पहिल्यांदा ‘व्हॅनिटी व्हॅन’ पाहिली. यानंतर पूनम भारतात आल्या आणि त्यांनी 25 व्हॅनिटी व्हॅन बनवून घेतल्या. हळुहळू या ‘व्हॅनिटी व्हॅन्स’ इतक्या लोकप्रिय झाल्या की आज बहुतेक मोठे स्टार्स त्यांची स्वत:ची आलिशान ‘व्हॅनिटी व्हॅन’ घेऊनच फिरतात.
पूनम यांचे नाव दिग्दर्शक रमेश तलवार यांच्याशी जोडले गेले. असे बोलले जाते की ‘नुरी’ च्या शूटिंगदरम्यान त्यांच्यातील जवळीक वाढली होती आणि रमेश यांनी पूनम यांच्यासाठी मुंबईत घरही खरेदी केले. मात्र, काही काळानंतर त्यांचा ब्रेकअप झाला. 1988 साली पूनम यांनी चित्रपट निर्माते अशोक ठकेरिया यांच्याशी लग्न केले. अशोक आणि पूनम यांना दोन मुलेही आहेत. मात्र, पूनम आणि अशोक यांचे नाते फार काळ टिकले नाही, त्यांनी 1997 मध्ये घटस्फोट घेतला. त्यानंतर पूनम त्यांच्या मुलांसह वेगळ्या राहू लागल्या.
एक्स्ट्रा मॅरिटल अफेअर चर्चेत
अशोक यांच्यासोबत लग्न झाल्यानंतर काही वर्षांनी पूनम यांना समजले होते की, त्यांच्या पतीचे विवाहबाह्य संबंध आहेत. पतीला धडा शिकवण्यासाठी पूनम यांनीही विवाहबाह्य संबंध ठेवले होते. मात्र, त्यांनी असा बदला घ्यायचे ठरवले असूनही त्यांचे लग्न टिकले नाही. शेवटी पूनम यांनी अशोक ठकेरियांना घटस्फोट दिला.
