परभणी : दुचाकीवर रील बनवणं विद्यार्थ्यांच्या जीवावर बेतलं आहे. परभणीमध्ये झेंडावंदनाला एकाच गाडीवर जाणाऱ्या चार विद्यार्थ्यांचा रील तयार करताना अपघात झाला. यामध्ये एका विद्यार्थ्याचा मृत्यू झाला आहे तर तीन विद्यार्थी गंभीर जखमी झाले आहेत.
झेंडावंदनाला जाताना ‘मेला’ या चित्रपटातील ‘डर है तुझे किस बात का ?’ या गाण्यावर विद्यार्थी रील तयार करत होते. यावेळी त्यांच्या गाडीला अपघात झाला. उपचारासाठी त्यांना जवळच्या रुग्णालयात दाखल करण्यात आले होते. उपचारादरम्यान एका विद्यार्थ्याचा मृत्यू झाला तर तीन जणांची प्रकृती गंभीर आहे.
परभणीच्या पाथरी – सोनपेठ मार्गावर आज सकाळी शाळेत झेंडावंदनासाठी जाणाऱ्या नववीच्या चार विद्यार्थ्यांचा भीषण अपघात झाला. ज्यात 4 ही जण गंभीर जखमी झाले होते. या अपघातानंतर या 4 जणांचा एक व्हिडिओ व्हायरल झाला आहे. ज्यात हे चार जण शाळेकडे जात असताना पाथरी – सोनपेठ मार्गावर चक्क रील बनवत असताना दुचाकीला ॲटोने धडक दिली. हा व्हिडीओ अपघातापूर्वी काही वेळ अगोदरचा असल्याचे पोलिसांनी सांगितले आहे. त्यामुळे एका दुचाकीवर 4 जण त्यात मोबाईलवर रिल बनवणे या 4 ही जणांना चांगलेच महागात पडले आहे.
व्हिडीओत जो गाडी चालवतोय तो स्वप्नील चव्हाण असून त्याचा या अपघातात एक हात तुटलाय तर शंतनू सोनवणे या विद्यार्थ्याचा उपचारादरम्यान मृत्यू झाला आहे. इतर विद्यार्थ्यांची प्रकृती चिंताजनक आहे. त्यांच्यावर अंबाजोगाईच्या ‘स्वाराती’ रुग्णालयात उपचार सुरू आहेत.
