मुंबई : टाटा ग्रुपचे माजी अध्यक्ष आणि प्रसिद्ध उद्योजक सायरस मिस्त्री यांचा रस्ते अपघातात मृत्यू झाल्याची घटना आज दिनांक 4 सप्टेंबरला दुपारी 3 वाजता घडली आहे. मुंबई – अहमदाबाद महामार्गावर पालघरजवळ घडलेल्या भीषण अपघातात मिस्त्री यांचा मृत्यू झाला. मिस्त्री यांच्यासह आणखी एका व्यक्तीचा या अपघातात मृत्यू झाला आहे.
प्राप्त माहितीनुसार, सायरस मिस्त्री हे अन्य तीन व्यक्तींसह गुजरातहून मुंबईकडे येत होते. मिस्त्री हे आपल्या कारने अन्य तीन मित्रांसह मुंबई – अहमदाबाद महामार्गावरून येत असताना पालघरजवळ कारला भीषण अपघात झाला.
चालकाचं नियंत्रण सुटल्यामुळे भरधाव कार नदीच्या पुलाला जाऊन धडकली. या धडकेत गंभीर जखमी झालेल्या सायरस मिस्त्री यांचा मृत्यू झाला. मिस्त्री यांच्यासोबत असलेल्या पंडोले नामक व्यक्तीचाही या अपघातात मृत्यू झाला आहे, तर इतर दोन सहकारी जखमी झाले आहेत.
अपघातातील जखमींना पुढील उपचारासाठी वापी येथे नेलं असल्याची माहिती आहे. सायरस मिस्त्री यांच्या निधनाने उद्योग जगतावर शोककळा पसरली असून विविध क्षेत्रातील दिग्गजांकडून त्यांना श्रद्धांजली अर्पण केली जात आहे.
