टीम AM : अंबाजोगाई शहरात कोट्यवधी रुपयांची रस्त्यांची कामं सुरू आहेत. आमदार नमिता मुंदडा यांनी शहरातील रस्त्यांसाठी कोट्यवधी रुपयांचा निधी आणल्याचे सातत्याने सांगितले जात आहे. दुसरीकडे क्रांतीनगरसारख्या मागासवर्गीय वस्त्यांतील रस्त्यांची अवस्था अत्यंत दयनीय झाली आहे. येथील रस्त्यांवर मोठमोठे खड्डे पडले असून “रस्त्यात खड्डा की खड्यात रस्ता” असा प्रश्न स्थानिक नागरिकांना पडला आहे. या खराब रस्त्यांचा सर्वाधिक त्रास लहान मुलांना सहन करावा लागत आहे. दरम्यान, नगराध्यक्षांना प्रस्थापितांच्या वसत्यातील छोटछोट्या रस्त्यांची चिंता आहे, पण मागासवर्गीय वसत्यातील लहान चिमुकल्यांना इजा पोहचवणाऱ्या रस्त्याची चिंता नाही, असा आरोप आता वसत्यातील नागरिक करित आहेत.
क्रांतीनगर मधील या खराब रस्त्यामुळे शाळेत जाताना किंवा खेळताना चिमुकल्यांना वारंवार ठेचा लागत असून अनेकदा किरकोळ दुखापती होत आहेत. त्यामुळे नागरिकांमध्ये तीव्र नाराजी व्यक्त होत आहे. “या ठेसांच्या वेदना नगराध्यक्षांना जाणवतील काय” ? असा सवालही स्थानिक रहिवासी उपस्थित करत आहेत. नगराध्यक्ष नंदकिशोर मुंदडा तसेच नगरपरिषद प्रशासनाने तातडीने याची दखल घेऊन रस्त्याची दुरुस्ती करावी, अशी मागणी नागरिकांकडून जोर धरत आहे.
दरम्यान, अंबाजोगाई शहरातील विकासकामांमध्ये सर्व भागांना समान न्याय मिळावा आणि क्रांतीनगरसारख्या भागांकडेही तितक्याच गांभीर्याने लक्ष द्यावे, अशी अपेक्षा या भागातील नागरिकांकडून व्यक्त होत आहे.
नगराध्यक्षांना मुहूर्त सापडेना…!
नगरपरिषदेकडून निधी मंजूर असतानाही क्रांतीनगरमधील रस्त्याचे काम अद्याप सुरू झालेले नाही. रस्त्यांवरील मोठमोठ्या खड्ड्यांमुळे लहान मुलांसह नागरिकांना मोठा त्रास सहन करावा लागत आहे. शहरातील प्रस्थापित वस्त्यांतील रस्त्यांची चिंता केली जाते, मग मागासवर्गीय वस्त्यांकडे दुर्लक्ष का ? असा सवाल नागरिक उपस्थित करत आहेत. क्रांतीनगरच्या रस्त्याचे काम सुरू करण्यासाठी नगराध्यक्षांना मुहूर्त सापडेना, अशी चर्चा आता परिसरातील नागरिकांतून होत आहे.
