टीम AM : ‘लेडी अमिताभ’ म्हणून प्रसिद्ध असलेल्या अभिनेत्री, राजकारणी विजयाशांती यांचा आज वाढदिवस आहे. त्यांचा जन्म. 24 जून 1966 रोजी झाला. ‘लेडी अमिताभ’ म्हणून प्रसिद्ध असलेल्या अभिनेत्री विजयाशांती यांचा जन्म मद्रास येथे एक तेलुगू कुटुंबात झाला. त्यांची आई वरलक्ष्मी आणि वडील श्रीनिवास प्रसाद, जे तेलंगणाच्या वारंगल जिल्ह्यातून मद्रास येथे स्थायिक झाले. त्या प्रसिद्ध तेलुगू अभिनेत्री विजयललिताची भाची आहे. त्या म्हणतात की, त्या मद्रासपेक्षा स्वतःला तेलंगणामधील असल्याचे समजणे पसंत करतात.
1980 मध्ये भारतीराजा दिग्दर्शित ‘कल्लुक्कुल इरम’ या तमिळ चित्रपटापासून वयाच्या 14 व्या वर्षी विजयशांतीने आपल्या अभिनय कारकीर्दीची सुरूवात केली. त्याच वर्षी विजया निर्मला दिग्दर्शित ‘किलाडी कृष्णुडू’ या चित्रपटाद्वारे त्यांनी तेलुगू चित्रपटसृष्टीत पदार्पण केले. त्यांना ‘विजया शांती’ असे नाव देण्यात आले होते, जी तिच्या आत्या आणि ज्येष्ठ अभिनेत्री विजया ललिता यांच्यावर आधारित होते. ‘सत्यम – शिवम’ (1981) या तेलगू चित्रपटात तिला भूमिकाही मिळाली ज्यात एन. टी. रामराव आणि अक्किनेनी नागेश्वर राव यांचा समावेश होता. त्यांचा उल्लेखनीय चित्रपट 1983 साली आलेला ‘नेती भरतम’ होता. तेथूनच त्यांनी महिला केंद्रित भूमिका साकारण्यास सुरुवात केली.
1985 मध्ये ‘प्रतिघाताना’ चित्रपटासाठी त्यांना पहिला नंदी पुरस्कार व ‘फिल्मफेअर’ पुरस्कार दक्षिण मिळाला. टी. कृष्णा दिग्दर्शित बऱ्याच चित्रपटांमध्ये त्यांनी अभिनय केला होता. 1990 च्या दशकात, ती एकमेव अभिनेत्री होती ज्याला भारतात सर्वाधिक मानधन मिळावे, अशी मागणी होती, जी सहकलाकार रजनीकांत आणि चिरंजीवी यांच्या बरोबरीची होती.
1989 मध्ये त्यांनी हिंदी चित्रपटसृष्टीत अनिल कपूर यांच्यासमवेत के. विश्वनाथ यांच्या ‘ईश्वर” चित्रपटा मधुन प्रवेश केला. त्यांच्या इतर बॉलिवूड चित्रपटांमध्ये ‘मुकद्दर का बादशाह’ (1990), ‘अपराधी’ (1992), ‘जमानत’ (1996), आणि ‘गुंडागर्डी’ (1997) यांचा समावेश आहे. 2006 च्या ‘नयुदम्मा’ चित्रपटानंतर त्यांनी चित्रपटसृष्टीतून विराम घेतला.
विजयाशांती यांनी 1990 च्या दशकात भाजपमध्ये प्रवेश करुन राजकारणाची सुरवात केली. त्या 1998 मध्ये भाजपच्या महिला आघाडीच्या सरचिटणीस होत्या. नंतर वेगळ्या तेलंगण राज्याच्या मुद्द्यावर त्या ‘टीआरएस’ चे प्रमुख के. चंद्रशेखर राव यांच्यासोबत गेल्या. वेगळ्या तेलंगण राज्यासाठी त्यांनी अतिशय आक्रमकपणे काम केले होते.
काही काळानंतर त्या काँग्रेसमध्ये गेल्या. मागील लोकसभा निवडणुकीत विजयाशांती या काँग्रेसच्या स्टार प्रचारक होत्या. शम्साबाद येथे झालेल्या जाहीर सभेत त्यांनी पंतप्रधान नरेंद्र मोदींची तुलना दहशतवाद्यांशी केली होती. यावरुन मोठा गदारोळ उडाला होता. ‘टीआरएस’ च्या तिकिटावर त्या मेडक लोकसभा मतदारसंघातून 2009 मध्ये निवडून आल्या होत्या. वेगळ्या तेलंगण आंदोलनासाठी त्यांनी ताली तेलंगण क्षेत्रीय पार्टी नावाचा पक्षही स्थापन केला होता. मात्र, त्या पक्षाचे अस्तित्व फार काळ टिकले नाही. त्या 2014 मध्ये ‘टीआरएस’ सोडून काँग्रेसमध्ये आल्या. विजयाशांती यांनी 7 डिसेंबर 2020 मध्ये भाजपमध्ये परत प्रवेश केला.
विजयशांती श्रीनिवास यांनी आपल्या 30 वर्षांच्या चित्रपट कारकीर्दीत, त्यांनी तेलुगू, तामिळ, मल्याळम, कन्नड आणि हिंदी असे विविध भारतीय भाषांमधील 180 हून अधिक वैशिष्ट्यीकृत चित्रपटांमध्ये भूमिका केल्या आहेत. पोलीस अधिकारीच्या भुमीकेत 1990 साली आलेल्या ‘कर्तव्यम’ या चित्रपटासाठी त्यांना सर्वोत्कृष्ट अभिनेत्रीचा राष्ट्रीय चित्रपट पुरस्कार देण्यात आला. 2002 मध्ये त्यांना तमिळनाडू सरकारकडून ‘कलाईममणी’ पुरस्कार मिळाला. त्यांना 6 ‘फिल्मफेअर’ पुरस्कार, दक्षिण व 4 नंदी पुरस्कार मिळाले आहेत.
शब्दांकन : संजीव वेलणकर
