टीम AM : एसटी अर्थात लालपरी म्हणजे ग्रामीण भागाची जीवनवाहिनी…याच एसटी महामंडळातील कर्मचाऱ्यांना आर्थिक अडचणींचा सामना करावा लागतोय. एकूणच कर्मचाऱ्यांच्या मार्च महिन्याचे वेतन फक्त 56 टक्केच देण्यात आलंय…यामुळं घर चालवायचं तरी कसं असा सवाल एसटी कर्मचारी आणि त्यांचे कुटुंबीय करीत होते. अखेर उपमुख्यमंत्री एकनाथ शिंदे यांनी यावर तोडगा काढला आहे.
एसटी कर्मचाऱ्यांचा उर्वरित 44 टक्के पगार येत्या मंगळवारपर्यंत देण्यात येणार आहे. उपमुख्यमंत्री एकनाथ शिंदे यांनी यासाठी पुढाकार घेऊन वित्त सचिवांशी केलेल्या चर्चेअंती एसटी कर्मचाऱ्यांचे प्रलंबित वेतन लवकरच अदा करण्याची त्यांनी तयारी दर्शवली आहे.
या चर्चेअंती एसटी कर्मचाऱ्यांचे या महिन्याचे उर्वरित 44 टक्के वेतन येत्या मंगळवारपर्यंत अदा करण्यात येईल, असे गुप्ता यांनी स्पष्ट केले. उपमुख्यमंत्री शिंदे यांच्या पुढाकाराने एसटी कर्मचाऱ्यांना दिलासा मिळाला असून त्यांच्यावरील वेतन कपातीचे संकट दूर होण्यास मदत झाली आहे.
