टीम AM : हवामान विभागानं वर्तविलेल्या अंदाजानुसार, अंबाजोगाई शहरांसह परिसरात मंगळवारी विजांचा कडकडाट आणि वादळी वाऱ्यासह पावसानं हजेरी लावली. मागील काही दिवसांपासून प्रचंड उकाडा वाढल्याने नागरिक त्रस्त झाले होते. मात्र, मंगळवारी सायंकाळी आलेल्या पावसामुळं वातावरणात गारवा निर्माण झाल्यानं नागरिकांची उकाड्यापासून सुटका झाली.
आज दिनांक 8 ऑक्टोबर रोजी सायंकाळच्या सुमारास विजांच्या कडकडाटात अंबाजोगाई शहरांसह तालुक्यात पावसाने झोडपले. त्यामुळे नागरिकांची चांगलीच तारांबळ उडाली.
हाती आलेल्या माहितीनुसार अंबाजोगाई परिसरातील अनेक भागात पावसाने हजेरी लावली आहे. यामुळे रस्त्यावर आणि सखल भागात पाणी साचल्याने याचा त्रास सर्वसामान्य नागरिकांना होत आहे. दरम्यान, हवामान विभागाने पुढील 5 दिवस राज्यातील काही भागात हलक्या ते मध्यम पावसाचा अंदाज दिला आहे.
