टीम AM : आजच्या युगात तंत्रज्ञान प्रत्येक क्षेत्रात समाविष्ट आहे. सध्यास्थितीत आर्टिफिशियल इंटेलिजन्स [AI] हे तंत्रज्ञानाचे प्रतीक म्हणून उभे झाले आहे. [AI] चा उपयोग विविध क्षेत्रांमध्ये वाढत आहे आणि आता ते इतिहासाचे चित्रण आणि जतन करण्याच्या पद्धतीमध्येपण बदल घडवणार आहे. [AI] चा एक उपयोग हा इमेज निर्माण करण्यासाठी आणि प्राचीन ठिकाणांची पुनर्कल्पना करण्यासाठी आपण करू शकतो, ज्यामुळे भूतकाळातील अवशेषांना आपण एका नवीन दृष्टीकोनातून पाहू शकतो.
ऐतिहासिक माहिती, वास्तुशास्त्र योजना आणि विद्यमान अवशेषांचे विश्लेषण करून ऐतिहासिक स्थळे भूतकाळात कशी दिसली असतील याची कल्पना आपण जनरेटिव्ह [AI] च्या मदतीने करू शकतो. हे तंत्रज्ञान इतिहासकार आणि सामान्य लोकांना आपल्या सांस्कृतिक वारसाचा सखोल अभ्यास व प्रशंसा करण्यास मदत करू शकतो.
हत्तीखाना आपल्या अंबानगरीतलं एक प्राचीन स्थळ आहे, जे अलिकडच्या वर्षांत दुर्लक्षितता, कचरा आणि असामाजिक घटकांनी केलेल्या नुकसानामुळे त्रस्त आहे. जनरेटिव्ह [AI] च्या मदतीने आपण आपल्या अंबाजोगाईच्या प्राचीन काळातील भव्यता आणि सौंदर्याचे चित्रण व पुनर्कल्पना करू शकतो. एकमेव असे कोरीव विशाल हत्ती व विविध देवांच्या शिल्पआकृत्या हे प्राचीन कारागिरांच्या कौशल्याचे साक्षीदार आहेत.
अंबाजोगाईचे नागरिक म्हणून आपल्याला हत्तीखाना आणि आपल्या शहरातील विविध प्राचीन स्थळांचे संरक्षण आणि जतन करण्यासाठी प्रयत्न केले पाहिजेत. असे करूनच आपण आपल्या ऐतिहासिक वारसाचा सन्मान करु शकतो आणि येणाऱ्या पिढ्यांना या खजिन्याचे ऐतिहासिक आणि सांस्कृतिक महत्त्व समजवू शकतो.
– आयुष जगदीश जाजू
