टीम AM : मित्राच्या लग्नासाठी जात असलेल्या तरुणांच्या कारला घोसापूरी शिवारात भीषण अपघात झाला. यामध्ये तिघांचा मृत्यू झाला असून एकजण गंभीर जखमी झाला आहे. जखमीला बीड येथील जिल्हा रुग्णालयात दाखल करण्यात आले. सदरील घटना आज दिनांक 23 जून रोजी पहाटे अडीच वाजण्याच्या सुमारास घडली असून माहिती मिळताच महामार्ग पोलिसांनी घटनास्थळी धाव घेऊन अपघात ग्रस्तांना मदत केली. सर्व मयत हे अहमदनगर जिल्ह्यातील आहेत.
धीरज गुणदेजा (वय 30 वर्ष), रोहन वाल्हेकर (वय 32 वर्ष), विवेक कांगुने (वय 32 वर्ष) अशी मयतांची नावे असून आनंद वाघ हा तरुण गंभीर जखमी झाला आहे. हे सर्वजण चार चाकी वाहनाने नेवासा (जि. अहमदनगर) येथून मित्राच्या लग्नाला जात होते. दरम्यान धुळे – सोलापूर राष्ट्रीय महामार्गावर पेंडगाव जवळील घोसापूरी शिवारातील हॉटेल प्यासा जवळ कारचा भीषण अपघात झाला.
हा अपघात इतका भीषण होता की, कारचा चक्काचूर झाला असून आतील तिघांचा जागीच मृत्यू झाला. हा अपघात चालकाचे वाहनावरील नियंत्रण सुटल्याने झाल्याची चर्चा आहे. अपघात घडल्याची माहिती मिळताच महामार्ग पोलिसांनी घटनास्थळी धाव घेत मदत केली.
