टीम AM : पुणे – मुंबई द्रुतगती मार्गावर झालेल्या एका भीषण अपघातामध्ये तीन जणांचा मृत्यू झाल्याची घटना घडली आहे. हा अपघात महामार्गावरील उर्से गावाजवळ घडला आहे. पुणे – मुंबई द्रुतगती मार्गावर उर्से गावाजवळच्या नागरिकांनी अपघात झाल्याची माहिती शिरगाव पोलिसांनी दिली. अपघातातील कार मुंबईहून पुण्याच्या दिशेने येत असताना हा अपघात झाल्याची प्राथमिक माहिती समोर आली आहे.
कारमध्ये बसलेल्या तीन जणांचा यात जागीच मृत्यू झाला असून अद्याप या तिघांची नावे समजू शकलेली नाहीत. सकाळी साडेसातच्या सुमारास हा अपघात झाल्याचे स्पष्ट होत आहे.
पोलिसांनी दिलेल्या माहितीनुसार, अपघातग्रस्त कार (एमएच 04 जेएम 5348) ही मुंबईहून पुण्याच्या दिशेने येत होती. या गाडीचा वेग जास्त होता, अशी माहिती पोलिसांकडून समजली आहे. उर्से गावाजवळ चालकाचं कारवरील नियंत्रण सुटलं आणि समोरच्या ट्रकला या कारनं मागच्या दिशेनं जोरात धडक दिली.
या भीषण अपघातात चालकासह दोन प्रवाशांचा जागीच मृत्यू झाला आहे. अपघात अत्यंत भीषण असल्याने यात कारच्या बॉनेटसह पुढील भागाचा चुराडा झाला आहे. भरधाव कारची अवस्था इतकी वाईट होती की कारचा पत्रा हा कटरने कापून आतील मृतदेह बाहेर काढावे लागले. या अपघातामुळे काही काळ वाहतूक कोंडी झाली होती. शिरगाव पोलिसांनी ही वाहतूक कोंडी सोडवली. पुढील तपास शिरगाव पोलिस करत आहेत.
