नवी दिल्ली : बीड जिल्ह्यातील रोहन बहीर ने स्वत:च्या जीवाची पर्वा न करता, नदीच्या पुरात वाहून जाणाऱ्या महिलेचे प्राण वाचविले. या साहसी शौर्याबद्दल ‘प्रधानमंत्री राष्ट्रीय बाल पुरस्कार’ त्याला राष्ट्रपती द्रौपदी मुर्मू यांच्या हस्ते प्रदान करण्यात आला.
येथील विज्ञान भवनात केंद्रीय महिला व बालविकास मंत्रालयाच्यावतीने ‘प्रधानमंत्री राष्ट्रीय बाल पुरस्कार 2023’ प्रदान कार्यक्रम आयोजित करण्यात आला. या पुरस्कार प्रदान सोहळयात राष्ट्रपती, केंद्रीय महिला व बालविकास मंत्री स्मृती झुबिन इराणी, केंद्रीय महिला व बालविकास राज्यमंत्री डॉ. मुंजपारा महेंद्रभाई, सचिव इंदिवर पांडे व्यासपीठावर उपस्थित होते.
या प्रसंगी देशभरातील 11 बालकांना सहा विविध श्रेणींमध्ये त्यांनी केलेल्या उल्लेख‍नीय कामगिरीसाठी ‘प्रधानमंत्री राष्ट्रीय बाल पुरस्कार’ देऊन सन्मानित करण्यात आले. यामध्ये 6 मुले आणि 5 मुलींचा समावेश आहे. राज्यामधून बीड जिल्ह्यातील रोहन बहीर या बालकाला त्याने केलेल्या शौर्यासाठी गौरविण्यात आले. प्रधानमंत्री राष्ट्रीय बाल पुरस्काराचे स्वरूप पदक, 1 लाख रूपये रोख आणि प्रमाणपत्र असे आहे.
रोहनने असे वाचविले प्राण
बीड जिल्ह्यातील राजुरी नवगण येथील रोहन बहीर याने गावातील डोंगरी नदीला आलेल्या पुरात पाय घसरून पडलेल्या महिलेला स्वत:च्या जीवाची पर्वा न करता मोठया साहसाने वाचविले. रोहनच्या समयसूचकतेमुळे महिलेचे प्राण वाचले. त्याच्या या शौर्यासाठी त्याला ‘प्रधानमंत्री राष्ट्रीय बाल पुरस्कार’ प्रदान करण्यात आला.
