मुंबई : सरत्या वर्षाला निरोप देण्यासाठी जगभरात नागरिकांमधून उत्साह दिसून येत आहे. नववर्ष आगमनाच्या शुभेच्छा संदेशांची देवाणघेवाणही सुरू झाली आहे. ऑस्ट्रेलिया खंडात न्यूझीलंड इथं नागरिकांनी नवीन वर्षाचं नयनरम्य रोषणाई तसंच आतिषबाजी करून जल्लोषात स्वागत केलं. अंबाजोगाईतही नवीन वर्षाचे स्वागत करण्यासाठी नागरिकांत उत्साह दिसून येेेत असून विविध वस्त्यांत, प्रभागातही स्वागताची तयारी जोमाने सुरू आहे.
राष्ट्रपती द्रौपदी मुर्मू यांनी नववर्षाच्या पूर्वसंध्येला देशवासियांना शुभेच्छा दिल्या आहेत. नवीन वर्ष प्रत्येकाच्या आयुष्यात नवीन आनंद, ध्येय, प्रेरणा आणि मोठे यश घेऊन येईल. हे नवीन वर्ष प्रगती आणि भरभराटीचे ठरो, अशा शुभेच्छा त्यांनी दिल्या. देशाची एकता, अखंडता आणि सर्वसमावेशक विकासासाठी स्वत:ला समर्पित करण्याचं आवाहन राष्ट्रपतींनी केलं आहे.
उपराष्ट्रपती जगदीप धनखड यांनी जनतेला नवीन वर्षाच्या शुभेच्छा दिल्या. हा आनंदाचा प्रसंग विकासाची गती सुनिश्चित करण्यासाठी आपले प्रयत्न अधिक जोमाने टिकवून ठेवण्याची संधी असल्याचं त्यांनी आपल्या संदेशात म्हटलं आहे. देशाला प्रगती आणि समृद्धीच्या नव्या उंचीवर नेण्याचा संकल्प करून नवीन वर्षाची सुरुवात करण्याचं आवाहन उपराष्ट्रपतींनी जनतेला केलं.
राज्यातल्या देवस्थानांच्या ठिकाणी सरत्या वर्षाला निरोप देत नवीन वर्षाचं स्वागत करण्यासाठी नागरिकांनी गर्दी केली आहे. पंढरपूरचं विठ्ठल मंदिर, कोल्हापूरचं अंबाबाई मंदिर, अक्कलकोटच्या स्वामी समर्थ मंदिरामध्ये दर्शनासाठी भाविकांनी मोठी गर्दी केली आहे. भाविकांच्या स्वागतासाठी मंदिर प्रशासनाकडूनही जय्यत तयारी करण्यात आली आहे.
शिर्डीत आज पहाटेपासूनच साई भक्तांची मोठी गर्दी दिसून येत आहे. नवीन वर्षाच्या स्वागतासाठी राज्यासह देशभरातून भाविक शिर्डीत दाखल झाले आहेत. सगळ्या भक्तांना साईदर्शन घेता यावं यासाठी आज रात्रभर साई मंदिर खुलं ठेवण्याचा निर्णय साईबाबा संस्थाननं घेतला आहे.
