टीम AM : 2002 साली प्रदर्शित झालेला ‘राज’ हा चित्रपट हिंदी चित्रपटसृष्टीतील सर्वाधिक गाजलेल्या भयपटांपैकी एक ठरला. महेश भट्ट दिग्दर्शित या चित्रपटाने बॉक्स ऑफिसवर मोठे यश मिळवले. बिपाशा बसू, डिनो मोरिया आणि मालिनी शर्मा या कलाकारांच्या अभिनयाने प्रेक्षकांची मने जिंकली. विशेषतः मालिनी शर्माने साकारलेली रहस्यमय व्यक्तिरेखा आजही प्रेक्षकांच्या स्मरणात आहे.
‘राज’ च्या प्रचंड यशानंतर मालिनी शर्मा बॉलिवूडमध्ये मोठी स्टार बनेल, अशी अपेक्षा व्यक्त केली जात होती. मात्र तसे झाले नाही. काही चित्रपट, म्युझिक अल्बम आणि जाहिरातींमध्ये झळकल्यानंतर ती अचानक रुपेरी पडद्यावरून गायब झाली. त्यामुळे “मालिनी शर्मा नेमकी कुठे गेली ?” हा प्रश्न अनेक वर्षे चाहत्यांना सतावत राहिला.
मालिनी शर्माने आपल्या करिअरची सुरुवात मॉडेल म्हणून केली. तिच्या आकर्षक व्यक्तिमत्त्वामुळे अनेक नामांकित ब्रँडच्या जाहिराती आणि म्युझिक व्हिडिओमध्ये तिला संधी मिळाली. गायक लकी अली यांच्या लोकप्रिय “कितनी हसीन जिंदगी” या म्युझिक व्हिडिओमुळे ती विशेष चर्चेत आली. त्यानंतर तिला बॉलिवूडमध्ये संधी मिळाली आणि ‘राज’ या चित्रपटाने तिच्या कारकिर्दीला मोठी ओळख मिळवून दिली.
‘राज’ नंतर मालिनीने ‘कुछ तो है’ (2003) या चित्रपटातही काम केले. मात्र हा चित्रपट अपेक्षेप्रमाणे यशस्वी ठरला नाही. त्यानंतर तिने चित्रपटसृष्टीपासून हळूहळू अंतर ठेवले. तिचे अभिनेता प्रियांशू चॅटर्जी यांच्यासोबत लग्न झाले होते. मात्र काही काळातच दोघांचा घटस्फोट झाला. त्यानंतर मालिनीने प्रसिद्धीच्या झगमगाटापासून दूर राहण्याचा निर्णय घेतला.
अनेक वर्षांनंतर मालिनी शर्मा पुन्हा सोशल मीडियावर सक्रिय झाली आहे. मात्र यावेळी अभिनेत्री म्हणून नव्हे, तर शेतकरी, निसर्गप्रेमी आणि फार्महाऊस उद्योजिका म्हणून ती चाहत्यांसमोर आली आहे.
पुण्याजवळील लोणावळा परिसरातील एका गावात मालिनीने जमीन खरेदी केली आहे. येथे तिने ‘फॉरेस्ट हाऊस’ आणि ‘सनसेट व्हिला’ अशी दोन सुंदर फार्महाऊस उभारली आहेत. या ठिकाणी ती शेती करते, फळे, फुले आणि सेंद्रिय भाज्यांची लागवड करते. सह्याद्रीच्या निसर्गरम्य वातावरणात ती शांत आणि समाधानी आयुष्य जगत आहे.
सोशल मीडियावर तिचा नवा लूक पाहून अनेक चाहते तिला ओळखूच शकले नाहीत. पांढरे झालेले केस, साधा पेहराव आणि नैसर्गिक जीवनशैली पाहून अनेकांना आश्चर्य वाटले. त्यावर ती मिश्कीलपणे म्हणते, “हो… मीच ती मालिनी!” तिचा हा साधेपणा आणि निसर्गाशी जोडलेली जीवनशैली चाहत्यांना विशेष भावत आहे.
विशेष म्हणजे, मालिनी आता तिची ‘फॉरेस्ट हाऊस’ आणि ‘सनसेट व्हिला’ ही फार्महाऊसे पर्यटकांसाठी भाडेतत्त्वावर उपलब्ध करून देण्याच्या तयारीत आहे. सोशल मीडियाच्या माध्यमातून ती आपल्या फार्महाऊसची, शेतीची आणि ग्रामीण जीवनाची झलक चाहत्यांना दाखवत आहे.
एकेकाळी रुपेरी पडद्यावर आपल्या सौंदर्याने आणि अभिनयाने प्रेक्षकांना भुरळ घालणारी मालिनी शर्मा आज प्रसिद्धीच्या झगमगाटापासून दूर, सह्याद्रीच्या कुशीत निसर्गाच्या सान्निध्यात समाधानाचे आयुष्य जगत आहे. बॉलिवूडमधील गूढसुंदरी म्हणून ओळख मिळवलेल्या या अभिनेत्रीने आता शेती, पर्यावरण आणि ग्रामीण जीवनाचा मार्ग स्वीकारला असून, तिच्या या नव्या प्रवासाचे चाहतेही भरभरून कौतुक करत आहेत.
बॉलिवूडच्या चकाकीपेक्षा मातीचा सुगंध, कॅमेऱ्याच्या प्रकाशापेक्षा निसर्गाची हिरवाई आणि प्रसिद्धीपेक्षा मनःशांती महत्त्वाची मानणारी मालिनी शर्मा आज अनेकांसाठी प्रेरणादायी ठरत आहे.
© लेखन : रामकुमार शेडगे
