टीम AM : सर्व शेतकऱ्यांना आवाहन करण्यात येते की, आपल्या तालूक्यात ई – पीक पाहणीचे प्रलंबित कामकाज आपल्या गावचे ग्राम महसूल अधिकारी यांच्या सहायक मार्फत करण्यात येत असून शेवटची तारीख दिनांक 28 फेब्रुवारी 2025 आहे. तरी सर्व शेतकऱ्यांनी ज्यांची पीक पाहणी झाली नाही अशांनी ती सहाय्यकाद्वारे लवकरात लवकर करून घ्यावी. तसेच ॲग्रीस्टॅक अंतर्गत शेतकरी ओळख क्रमांक नोंदणी, नजीकच्या आपले सरकार सेवा केंद्र येथे सुरू आहे.
प्रत्येक शेतकऱ्यास ॲग्रीस्टॅक फार्मर आयडी (शेतकरी ओळख क्रमांक) काढणे अनिवार्य आहे. यापुढील काळात शेतकऱ्यांना पी. एम. किसान योजना, पीक विमा, नैसर्गीक आपत्ती अनुदान, पिक कर्ज व इतर शासकीय योजनांचा लाभ घेण्यासाठी ही नोंदणी आवश्यक आहे.
नोंदणी न केल्यास शेतकऱ्यांना कुठल्याही शासकीस योजनांचा लाभ मिळणार नाही याची नोंद घ्यावी. शेतकरी ओळख क्रमांक काढण्यासाठी आधार कार्ड आणि मोबाईल क्रमांक तसेच शेतीचा गट क्रमांक माहीत असणे आवश्यक आहे. तरी सर्व शेतकरी बंधू भगिनींना आवाहन करतो की, त्यांनी लवकरात लवकर आपल्या नजीकच्या आपले सरकार सेवा केंद्र, महा – ई – सेवा केंद्र येथे संपर्क करून आपली नोंदणी करून घ्यावी, असे आवाहन तहसिलदार विलास तरंगे यांनी केले आहे.
