‘अंबाजोगाई मिरर’ ने प्रकाशित केले होते वृत्त : रुग्णांना मिळणार दिलासा
टीम AM : गोरगरीब रुग्णांसाठी संजीवनी ठरलेल्या ‘स्वाराती’ रुग्णालयात एक धक्कादायक बाब समोर आली होती. गेल्या वर्षभरापासून रुग्णालयात 8 कोटींची ॲन्जोग्राफी व ॲन्जोप्लास्टीची मशीन धूळखात पडली आहे, अशी माहिती आम्हाला सूत्रांकडून मिळाली होती. याबाबतचे सविस्तर वृत्त आम्ही ‘अंबाजोगाई मिरर’ च्या माध्यमातून प्रकाशित केले होते. त्याचाच आधार घेत आता ‘स्वाराती’ प्रशासनाने सकारात्मक पाऊल उचलले आहे. ॲन्जोग्राफी व ॲन्जोप्लास्टीची मशीन रुग्णालयात कार्यान्वित करण्यासाठी ‘स्वाराती’ प्रशासनाने पुढाकार घेतला असून लवकरच एका तज्ज्ञ कार्डीयॉलॉजिस्टची नेमणूक करण्यात येणार आहे. ज्यात ॲन्जोग्राफीची तपासणी करण्यात येणार आहे. त्यामुळे मोठ्या प्रमाणात रुग्णांना दिलासा मिळणार आहे.
‘स्वाराती’ रुग्णालय व वैद्यकीय महाविद्यालयात गोरगरीब रुग्णांना दर्जेदार आरोग्य सेवा उपलब्ध व्हावी, यासाठी राज्य सरकारकडून करोडो रुपयांचा निधी उपलब्ध करुन देण्यात येत आहे. याचाच भाग म्हणून गेल्या वर्षी वैद्यकीय शिक्षण व संशोधन विभागानं 8 कोटींची ॲन्जोग्राफी व ॲन्जोप्लास्टीची मशीन रुग्णालयाला उपलब्ध करुन दिली. या मशीनची इन्स्टॉलेशन प्रकिया देखील पूर्ण झाली असून केवळ डॉक्टर्स् आणि टेक्निशियन अभावी ही मशीन रुग्णालयात धूळखात पडून आहे. रुग्णालयात ही मशीन कार्यान्वित झाल्यास हृदयरोगाचे निदान व उपचार करण्यास मदत होणार आहे.
काय आहे ॲन्जोग्राफी ?
हृदयरोगाचे प्रमाण दिवसेंदिवस वाढतच चालले आहे. हृदयविकार हा वयाच्या कोणत्याही टप्प्यावर येवू शकतो. डॉक्टरांना वाटत असल्यास की एखाद्या व्यक्तीला हार्ट अटॅक येण्याची शक्यता आहे तर ते त्याची ॲन्जोग्राफी करण्यास सांगतात. ॲन्जोग्राफीमध्ये रक्तवाहिन्यांमध्ये ब्लॉकेजेस आहेत का ? ब्लॉकेजेस कुठे व किती आहेत. या सगळ्या गोष्टी ॲन्जोग्राफीमध्ये समजतात. तसेच ब्लॉकेजेसची स्थिती समजते. रक्तवाहिन्यांमध्ये गुठळी आहे की नाही याचे नक्की निदान यामध्ये सापडते. ही ॲन्जोग्राफी करण्यासाठी खाजगी रुग्णालयात भरमसाठ फी आकारली जाते.
