टीम AM : ‘दिल के अरमां आसुओं में बह गए…’ म्हणत रसिकांच्या काळजात अढळ स्थान मिळवणारी गायिका आणि बॉलीवुडची अभिनेत्री म्हणजे सलमा आगा. आज 25 ऑक्टोबरला त्यांचा जन्मदिवस आहे. आपला अभिनय, सौंदर्य, दिलखेचक अदा यासोबतच सुरेल अंदाज यामुळे सलमा आगा यांनी बॉलीवुडमध्ये 80 – 90 चे दशक गाजवलं.
मूळच्या पाकिस्तानी वंशाच्या असलेल्या सलमा आगा यांचा जन्म लंडनमध्ये झाला. लंडनमध्येच त्यांचं बालपण गेलं. कोणत्याही तरुणीला रुपेरी पडद्याची भुरळ पडावी तशी ती सलमा आगा यांनाही पडली आणि त्या बॉलीवुडकडे आकर्षित झाल्या. बी.आर. चोप्रा यांच्या निकाह सिनेमातून सलमा आगा यांनी हिंदी चित्रपटसृष्टीत पाऊल ठेवलं.
सलमा आगा यांच्याकडे घायाळ करणारं सौंदर्य, अभिनय कौशल्यासह मधुर सूरांची दैवी देणगी होती. त्यामुळेच पहिल्यावहिल्या सिनेमात त्यांना अभिनयासह पार्श्वगायनाची संधी लाभली. या सिनेमातील ‘दिल के अरमां आसुओं में बह गए…’ या गाण्यासाठी त्यांना सर्वोत्कृष्ट पार्श्वगायिकेचा फिल्मफेअर पुरस्कार मिळाला होता. पहिल्याच सिनेमानं त्यांना रातोरात स्टार बनवलं.
मात्र, हे स्टारपण त्यांना जपता आलं नाही. त्यांनी अनेक सिनेमा केले. मात्र, रसिकांनी या सिनेमांना नाकारलं. चुकीच्या सिनेमांची निवड त्याला कारणीभूत ठरल्याचा दावा त्यावेळी सलमा आगा यांनी केला. सिनेमापेक्षा त्यांच्या रिअल लाईफ रोमान्सच्याच चर्चा जास्त हिट ठरल्या. त्यांच्या खासगी जीवनातही बरीच उलथापालथ झाली.
वयाच्या 16 व्या वर्षी लग्न करणाऱ्या या अभिनेत्रीचा तीन वेळा घटस्फोट झाला. करियरमधील उलथापालथ आणि वाद यामुळं त्यांनी 1996 साली ‘गहरा राज’ सिनेमानंतर बॉलीवुडला अलविदा केलं. त्यामुळं रिअल लाईफमध्ये सलमा आगा यांच्यावर दिल के अरमां आसुओं में बह गए…’ म्हणायची वेळ आली. सलमा आगाची मुलगी जारा खान ही अभिनेत्री असून ती आपली आई सलमा आगा यांच्या पावलावर पाऊल ठेवत अभिनयात नशीब आजमावत आहे. अर्जुन कपूरच्या अपोझिट ‘औरंगजेब’ या सिनेमातून तिने बॉलिवूडमध्ये पदार्पण केले होते. यानंतर ‘देसी कट्टा’ या सिनेमातही ती दिसली होती.
