टीम AM : दोन ट्रकच्या झालेल्या अपघातात 5 जण ठार तर 150 मेंढ्या दगावल्याची घटना आज दि. 25 मे गुरुवार रोजी पहाटे चार वाजण्याच्या सुमारास घडली. कळमनुरी ते आखाडा बाळापूर मार्गावर माळेगाव फाट्याजवळ हा भीषण अपघात झाला. सलमान आली मौला, सत्यनारायण बळाई, लालू मीना, कदीर मेवाती, आलम अली अशी मृत्यू झालेल्यांची नावे आहेत. यातील एक जण राजस्थानमधील तर इतर चौघेजण मध्यप्रदेशातील असल्याची माहिती सुत्रांकडून मिळली आहे.
राजस्थान येथील ट्रक (एचआर 55 एजे 3111) 200 मेंढ्यांना घेऊन हैदराबादकडे निघाला होता. या ट्रकमध्ये ट्रकचालकासह चौघेजण केबिनमध्ये बसले होते. तर, एक व्यक्ती पाठीमागे मेंढयांसोबत बसला होता. हा ट्रक माळेगाव फाट्याजवळ आला असताना उड्डाणपुलाखाली ट्रक चालकाला डूलकी लागली. अशात हा ट्रक समोर उभा असलेल्या ट्रकवर आदळला. या अपघातामध्ये ट्रकमधील तिघे जण जागीच ठार झाले. तर, दोन जण गंभीर जखमी झाले होते.
रुग्णालयात नेत असतानाच त्यांचाही मृत्यू झाला. तसेच, दीडशे मेंढ्याही दगावल्या. अपघाताची माहिती मिळाल्यानंतर कळमनुरी पोलिस ठाण्याचे पोलिस निरीक्षक वैजनाथ मुंडे, सहाय्यक पोलीस निरीक्षक रेखा उाहारे, जमादार दिलीप पोले, संजय राठोड, इंगोले, गजानन होळकर यांच्या पथकाने घटनास्थळी धाव घेतली. पोलिसांनी अपघातातील जखमींना उपचारासाठी कळममनुरीच्या ग्रामीण रुग्णालयात दाखल केले.
