बुलढाणा : आजचा रविवार अपघातवार ठरला आहे. आज रविवारी सकाळी समृद्धी महामार्गावर भीष अपघात झाला आहे. मेहकर – सिंदखेडराजा दरम्यान (जि. बुलढाणा) लोणार तालुक्यातील शिवणी पिसा नजीक इर्टिगा गाडीला भीषण अपघात झाला आहे. या अपघातात सहा जण ठार झाले तर सहा जण गंभीर जखमी झाले आहेत. जखमींना रुग्णालयात दाखल केले असून, त्यांच्यावर उपचार सुरु आहेत. जखमी तसेच मृत हे छत्रपती संभाजीनगर मधील एन -11 मधील रहिवाशी असल्याची माहिती मिळाली आहे. तसेच सहा जण जागीच ठार झाल्याने परिसरात हळहळ व्यक्त केली जात आहे.
देवदर्शनाला जात असताना अपघात
दरम्यान, हा अपघात रविवारी सकाळी लोणार तालुक्यातील शिवणी पिसा ते दुसरबीड दरम्यान घडला. भरधाव वेगातील इर्टिगा गाडी ही रस्त्याच्या मधोमध असलेल्या डिव्हायडरमध्ये घुसली व तीन ते चार पलट्या मारून दुसऱ्या बाजूच्या रस्त्यावर उलटली. अपघातग्रस्त ईर्टीगाचा क्रमांक एमएच 20 – 8962 आहे. यातील सर्व एन -11 द्वारकानगरचे रहिवासी असून ते त्यांच्या कुटुंबासह देवदर्शनासाठी समृद्धी महामार्गावरून जात होते.
रुग्णालयात दोघांचा मृत्यू
मागील काही दिवसांपासून समृद्धी महामार्गावर अपघातांच्या घटनेत वाढ होताना दिसत आहे. या अपघातामध्ये चार जण घटनास्थळीच ठार झाले तर दोन जणांचा रुग्णालयात उपचारादरम्यान मृत्यू झाला. मृतकांची नावे अद्याप स्पष्ट झालेली नाहीत. या वाहनामध्ये जवळपास 13 जण होते, अशी माहिती आहे. यात काही लहान मुलांचाही समावेश होता.
