मुंबई : ‘टाइमपास 3’ या झी स्टुडिओज् आणि अथांश कम्युनिकेशनची निर्मिती असलेल्या आणि रवी जाधव यांच्या दिग्दर्शित चित्रपटाचा ट्रेलर दिमाखदार सोहळ्यात प्रदर्शित करण्यात आला. यावेळी दिग्दर्शक रवी जाधव, झी स्टुडिओजचे बिझनेस हेड मंगेश कुलकर्णी, निर्मात्या मेघना जाधव यांसह चित्रपटाची संपूर्ण टीम उपस्थित होती.
या चित्रपटात दगडूच्या भूमिकेतील प्रथमेश परब आणि पालवी हृता दुर्गुळे सोबतच माधव लेले उर्फ शाकाल म्हणजेच वैभव मांगले, शांताराम परब म्हणजे भाऊ कदम, आरती वडगबाळकर, दगडू गॅन्ग आणि एका जबरदस्त भूमिकेत संजय नार्वेकर बघायला मिळणार आहेत.
चित्रपटातील गाणी क्षीतिज पटवर्धन यांची आहेत तर संगीत अमितराज यांचं आहे. कथा रवी जाधव यांची असून त्यांच्या सोबतीने प्रियदर्शन जाधव याने पटकथा आणि सवांद लिहिले आहेत.
रवी जाधव म्हणाले की, टाइमपासच्या पहिल्या भागात शेवटी दगडू म्हणतो की ‘आपण शिक्षणाचा ब्रिज घेऊन प्राजूपर्यंत पोहचणार. दुसऱ्या भागाची सुरुवात एक यशस्वी उद्योजक बनलेल्या दगडूच्या गोष्टीपासून झाली होती. या दोन्हीच्या मधला नेमका दगडूचा प्रवास कसा होता ? शिक्षणाचा ब्रिज घेताना त्या वाटेत त्याला नेमकं कोण कोण भेटलं ? कोणतं वळण आलं ? हे सांगायचं राहून गेलं होतं. तेच सर्व तेवढ्याच धमाल पद्धतीने सांगण्यासाठी आम्ही ‘टाइमपास 3’ चा घाट घातला. माझ्या मते एखाद्या चित्रपटाचा पूर्वार्ध (प्रिक्वेल) आणि उत्तरार्ध (सिक्वेल) प्रदर्शित झाल्यानंतर अशी मधली गोष्ट सांगणारा भाग आणणे हा प्रयोग मराठीत पहिल्यांदाच होत असेल.
झी स्टुडिओज् चे व्यवसाय प्रमुख मंगेश कुलकर्णी म्हणाले की, ‘टाइमपास’ या चित्रपटाचं, यातील व्यक्तिरेखांचं प्रेक्षकांच्या मनात एक विशेष असं स्थान आहे. ही बाब लक्षात घेऊनच रवी जाधव यांनी ‘टाइमपास 3’ ची संकल्पना आमच्यासमोर मांडली आणि आम्हालाही ती आवडली.
