डीवायएफआय – एसएफआयची उपजिल्हाधिकारी कार्यालयासमोर तीव्र निदर्शने
अंबाजोगाई : डेमोक्रॅटिक युथ फेडरेशन ऑफ इंडिया (डीवायएफआय) आणि स्टुडंट्स फेडरेशन ऑफ इंडिया (एसएफआय) च्या वतीने केंद्र सरकारच्या ‘अग्निपथ’ योजनेच्या विरोधात अंबाजोगाई उपजिल्हाधिकारी कार्यालयावर तीव्र निदर्शने करण्यात आली. सैन्य भरतीत कंत्राटी पद्धत आणणाऱ्या भाजपच्या केंद्र सरकार विरोधात डीवायएफआय – एसएफआय तर्फे देशभरात हे आंदोलन करण्यात येत आहे.
यावेळी उपजिल्हाधिकारी यांच्यामार्फत प्रधानमंत्री यांना पाठवण्यात आलेल्या निवेदनात डीवायएफआय – एसएफआयने म्हटले आहे की, केंद्र सरकारने अलीकडेच जाहीर केलेली नवीन लष्कर भरती ‘अग्निपथ’ योजना ही देशासाठी आपत्ती आणि भारताच्या सार्वभौमत्वाला धोका आहे. सरकारने गेल्या दोन वर्षांपासून नियमित लष्करी भरती केली नाही. त्यामुळे 2021 पर्यंत भारतीय सैन्यात 1 लाख 4 हजार 653 जवानांची कमतरता होती. ही पदे भरण्याऐवजी सरकारने आता प्रादेशिक कोटा पूर्णपणे काढून टाकण्याचा आणि 6 महिन्यांच्या प्रशिक्षण कालावधीसह चार वर्षांच्या अल्पकालीन ‘अग्निपथ’ भरती योजना लागू करण्याचा निर्णय घेतला आहे.
चार वर्षानंतर सुमारे तीन चतुर्थांश (35 हजार) सैनिक पेन्शन किंवा ग्रॅच्युइटीशिवाय निवृत्त होतील. या धोरणामुळे दरवर्षी अंदाजे 35 हजार तरुण बेरोजगार होतील. ज्यामुळे कालांतराने समाजाचे सैन्यीकरण होईल. हे धोरण आपल्या सार्वभौमत्वाचे व स्वातंत्र्याचे रक्षण करणाऱ्या सुरक्षा दलांच्या मनोबल आणि व्यावसायिकतेवरही गंभीर परिणाम करेल. सशस्त्र दलांनी दरवर्षी लाखो तरुणांना सुरक्षित आणि दीर्घकालीन रोजगाराचा स्रोतही उपलब्ध करून दिला आहे. या धोरणामुळे ही शक्यताही संपुष्टात येणार आहे. आपल्या सरकारने अवलंबिलेल्या नव – उदारवादी धोरणांमध्ये संभाव्य कामाचे कंत्राट देण्याच्या केंद्राच्या योजनेत ‘अग्निपथ’ योजनेचा समावेश आहे. या धोरणाचा परिणाम म्हणून देशातील नोकऱ्यांची सुरक्षितता आणि आर्थिक स्थैर्य पूर्णपणे नष्ट होण्याची खात्री आहे. या धोरणाद्वारे सरकारने जगातील भांडवलदारी, साम्राज्यवादी शक्तींना प्रशिक्षित बेरोजगार सैनिकांच्या भरतीसाठी दरवाजे देखील खुले करून दिले आहेत.
डीवायएफआय आणि एसएफआय देशाच्या सार्वभौमत्वावरील व भारतीय लोकांवरील, तसेच स्वातंत्र्यावरील भांडवलदारी हल्ल्यांचा तीव्र विरोध करत असून भारताचे सार्वभौमत्व व अखंडता धोक्यात आणणारी, सशस्त्र दलांमधील स्थैर्य धोक्यात आणणारी फसवी ‘अग्निपथ’ योजना तात्काळ रद्द करण्याची आणि सशस्त्र दलांमध्ये पूर्वी प्रमाणेच नियमित सैन्य भरती करण्याची मागणी करत आहे.
या आंदोलनात डीवायएफआयचे जिल्हा सचिव विशाल देशमुख, सुहास चंदनशिव, देविदास जाधव, हनुमान शिंदे, मोनाज देशमुख, प्रशांत मस्के, प्रशांत कोकाटे, जगन्नाथ पाटोळे, अंकुश कोकाटे, राम गडदे, सिद्राम सोळंके, सारंग भगत, विष्णू नागरगोजे, विजय घुगे सह शेकडो युवक सहभागी झाले होते.
