मुंबई : बॉलिवूडचे ‘शहंशाह’ अमिताभ बच्चन यांची महत्त्वाची भूमिका असलेला नागराज मंजुळे दिग्दर्शित ‘झुंड’ या चित्रपटाचा ट्रेलर प्रदर्शित झाला असून तो चांगलाच चर्चेत आहे. ‘सैराट’ या चित्रपटातून अनेकांची मने जिंकणारी जोडी अभिनेता आकाश ठोसर आणि अभिनेत्री रिंकू राजगुरु पुन्हा एकदा प्रेक्षकांच्या भेटीला या चित्रपटाद्वारे येणार आहेत.
चित्रपटाच्या ट्रेलरमधील म्युझिकने सर्वांचे लक्ष वेधून घेतले आहे. ‘झुंड’ या चित्रपटाला अजय – अतुल या जोडीने संगीत दिले आहे. एकंदरीत चित्रपटाचा ट्रेलर पाहाता चाहत्यांमध्ये चित्रपटाबाबत उत्सुकता पाहायला मिळते. हा चित्रपट स्लमसॉकरचे संस्थापक विजय बरसे यांच्या आयुष्यावर असल्याचे म्हटले जात आहे.
अमिताभ बच्चन आणि नागराज मंजुळे यांचा ‘झुंड’ हा चित्रपट 4 मार्च रोजी चित्रपटगृहांमध्ये प्रदर्शित होणार आहे. या चित्रपटात अमिताभ बच्चन हे महत्त्वाच्या भूमिकेत दिसणार आहेत तर आकाश ठोसर आणि रिंकू राजगुरु यांना पुन्हा एकत्र पाहण्यासाठी चाहते उत्सुक आहेत.
