टीम AM : जेष्ठ गीतकार मजरुह सुलतानपुरी यांचा जन्मदिन. त्यांचा जन्म. 1 ऑक्टोबर 1919 साली झाला. हसरालूल हसन हे मजरुह सुलतानपुरी यांचे खरे नाव. शायरीच्या वेडातूनच हसरालूल हसन पुढे मजरुह सुलतानपुरी झाले. मजरुह म्हणजे जखमी किंवा घायाळ करणारा. मजरुह यांच्या गीतांनी रसिकांना प्रेमळ जखमा दिल्या. त्यांच्या गीताच्या जादूने कर्णसेनांना घायाळ केले.
प्रसिद्ध निर्माते – दिग्दर्शक ए. आर. कारदार यांनी एका मुशायरा कार्यक्रमात हसन यांची शायरी ऐकली. त्या वेळी ते ‘शहाजहान’ चित्रपटाच्या निर्मितीत होते. त्यांनी हसन ऊर्फ मजरुह सुलतानपुरीला गीतलेखन करण्याची ऑफर दिली. मजरुह यांनी नकार देण्याचा प्रश्नच नव्हता. मजरुह यांनी लेखणी उचलली आणि कागदावर शब्द उमटवले… ‘गम दिये मुस्तकिल, कितना नाजूक है दिल… ये न जाना… हाये हाये ये जालिम जमाना.’ ‘शहाजहान’ चे संगीतकार नौशाद यांनी वाहवा केली. नौशाद यांनी त्या खुशीतच चाल बांधली. पुढे कुंदनलाल सैगल यांच्या दर्दभर्यान आवाजाने मजरुह यांच्या शब्दाला आगळे गहिरेपण दिले. मजरुह यांच्या या पहिल्या गीतरूपी रेशमी बाणाने रसिकांना घायाळ केले. हे कमी की काय, म्हणून मजरुह यांनी पुढील गाण्यांची सुरुवात केली, ‘जब दिल ही टूट गया, हम जी कर क्या करे…’ तिच्या एका नकाराने, सर्वस्व हरपल्याची भावना मजरुह यांनी अशी व्यक्त केली. सैगलच्या आवाजातला या शब्दांतला दर्द काळीज पिळवटणारा ठरला. मजरुह यांच्या घायाळ करणाऱ्या कारकीर्दीचा प्रारंभच असा धडाक्यात झाला. साध्या, सोप्या परंतु काळजाला भिडणाऱ्या शब्दांची सुरेख गुंफण ही मजरुह यांच्या लेखणीची वैशिष्ट्ये.
पर्शियन शब्दांचा समर्पक वापर त्यांनी चपखलपणे केला. याच वैशिष्ट्यांमुळे चार पिढ्या त्यांच्या गीतांच्या चाहत्या बनल्या. मजरुह यांच्या ‘शायराना’ स्वभावामुळे जवळपास सर्वच संगीतकारांबरोबर त्यांचे सुरेल नाते जमले. ‘शहाजहान’ मध्ये काळीज चिरणारे वर्णन करणारी त्यांची लेखणी ‘आरपार’ च्या वेळी मात्र प्रेमळ आणि हळवी झाली. तो आणि ती यांच्या नजरेच्या भाषेला, ‘कभी आर कभी पार लागा तीर ए नजर…’ असा रेशमी बाणाचा उपमात्मक आविष्कार झाल्यानंतर ‘बाबूजी धीरे चलना…’मधून प्रेमात कशी जपून पावले टाकायची, याची एवढी मधाळ जाणीव मजरुहच देऊ जाणे. मग ओपींचे ठेकेदार संगीत आणि मजरुह यांचे शब्द यांची कानसेनांना भुरळ पाडणारी जुगलबंदी सुरू झाली.
‘सीआयडी’ मध्ये याचा प्रत्यय आला. ‘लेके पहला पहला प्यार…’ अशी प्रेमाची ग्वाही असो, ‘कहीं पे निगाहे कहीं पे निशाना..’मधली सूचकता असो, ‘आँखों ही आँखों में इशारा हो गया…’ मधला जीवन जगण्याचा मार्ग असो, मजरुह यांच्या गीतांनी रसिकांच्या मनावर अधिराज्य गाजवले. त्यानंतर लक्ष्मीकांत – प्यारेलाल यांच्या ‘दोस्ती’ ला मजरुह यांच्या गीतांनी जो अर्थ प्राप्त झाला, त्याला तोडच नव्हती. ‘चाहूंगा मैं तुझे साँज सबेरे’, ‘मेरी दोस्ती मेरा प्यार…’, ‘राही मनवा दुख की चिंता…’ या गाण्यांनी इतिहास रचला. त्यानंतर मजरुहची जोडी जमली ती चतुरस्र आरडी बर्मनबरोबर. ‘ओ मेरे सोना…’, ‘आजा आजा मैं हूँ प्यार तेरा…’, ‘पिया तू अब तो आजा…’, ‘चढती जवानी…’, ‘कितना प्यारा वादा…’, ‘दिलबर दिल से प्यारे…’, ‘गोरिया कहां तेरा देस रे…’, ‘चुरा लिया है…’, ‘लेकर हम दीवाना दिल…’, ‘आपके कमरे मे…’, ‘मेरीसोनी…’, ‘क्या हुआ तेरा वादा…’, ‘बचना ए हसीनों…’, ‘चांद मेरा दिल…’, ‘ए लडका हाय अल्ला…’, ‘निसुल्ताना रे…’, ‘तुम बिन जाऊं कहां…’, ‘होगा तुम से प्यारा कौन…’, ‘पूछो ना यार क्या हुआ…’ ही या कॉम्बिनेशनची कामगिरी.
आनंद – मिलिंद, जतीन – ललित यांच्या संगीताने नटलेली मजरुह यांची अनेक गाणी गाजली. अष्टपैलुत्व हे त्यांच्या लेखणीचे सर्वात मोठे वैशिष्ट्य. चित्रपटातील सिच्युएशननुसार गीतलेखन करण्यात मजरुह यांचा हातखंडा. ‘तेरे मेरे मिलन की रैना…’ अभिमान मधला भाव वेगळा, तर ‘जाइए आप कहां जायेंगे…’ मेरे सनम मधला लडिवाळ गोडवा पुन:पुन्हा ऐकावासा वाटणारा. ‘रात अकेली है…’ज्वेल थीफ मधले आव्हान कानाला सुखावणारे, तर ‘रहे ना रहे हम…’ममता मधले औदासीन्य विचार करायला लावणारे. कारकीर्दीच्या प्रारंभीच्या काळात कम्युनिस्ट चळवळीत भाग घेणाऱ्या मजरुह यांनी एकदा पंडित नेहरूंबद्दल अनुदारात्मक काव्य केले. त्याबद्दल त्यांना तुरुंगवासही झाला.
1994 साली भारत सरकारने मजरुह सुलतानपुरी यांना ’दादासाहेब फाळके’ पुरस्कार प्रदान करून सन्मान केला. मजरुह सुलतानपुरी हे दादासाहेब फाळके पुरस्कार मिळवणारे पहिले गीतकार ! कोणताही भाव असो, कोणताही रस असो; तो भाव, रस आपल्या लेखणीने समृद्ध करण्याचे कसब मजरुह सुलतानपुरी यांच्याकडे होते. मजरुह सुलतानपुरी यांचे निधन 24 मे 2000 रोजी झाले. मजरुह सुलतानपुरी यांना आदरांजली.
शब्दांकन : संजीव वेलणकर
संदर्भ. इंटरनेट : काजय कुलकर्णी
