टीम AM : अंबाजोगाईत रक्षाबंधनाचा सण मोठ्या उत्साहात साजरा करण्यात आला. सकाळपासूनच शहरातील मुख्य बाजारपेठेत चैतन्यमय वातावरण होते. राख्या, मिठाई, भेटवस्तू आणि पारंपरिक वस्तूंची खरेदी करण्यासाठी अंबाजोगाईकरांची गर्दी उसळली होती. दुकाने, मिठाईच्या ठेल्यांपासून ते गिफ्ट शॉपपर्यंत ग्राहकांची वर्दळ सुरू होती. महिलांनी आणि मुलींनी विविधरंगी व आकर्षक राख्यांची खरेदी करून भावासाठी खास तयारी केली होती.
सकाळी शुभमुहूर्तावर बहिणींनी भावाच्या मनगटावर प्रेमाची राखी बांधत त्याच्या आरोग्य, सुख – समृद्धी आणि दीर्घायुष्याची प्रार्थना केली. भावांनीही बहिणींना भेटवस्तू, पैसे आणि मिठाई देत आपुलकी व्यक्त केली. काही कुटुंबांनी पारंपरिक विधींसह सण साजरा केला, तर काहींनी सामाजिक उपक्रम राबवून दिवस विशेष केला.
शहरातील शाळा, महाविद्यालये आणि सामाजिक संस्थांनीही रक्षाबंधनाचे विविध कार्यक्रम आयोजित केले. लहान मुलांपासून ते ज्येष्ठांपर्यंत सर्वांनी या सणात आनंदाने सहभाग घेतला. काही ठिकाणी महिला पोलिसांना व रुग्णालयातील कर्मचाऱ्यांना राख्या बांधून त्यांच्या सेवेसाठी कृतज्ञता व्यक्त करण्यात आली.
भावाबहिणींच्या नात्याचा हा सण अंबाजोगाईत पारंपरिक उत्साह, प्रेम आणि ऐक्याचे वातावरण निर्माण करून गेला. बाजारपेठेतील रंगत, घराघरातील आनंद आणि स्नेहबंधनाचा सोहळा यामुळे संपूर्ण शहरात उत्सवाचा माहोल अनुभवायला मिळाला.
