टीम AM : अंबाजोगाई तालुक्यात भीषण अपघाताची घटना समोर आली आहे. तालुक्यातील बर्दापूर – हातोला रस्त्यावर लिंबगाव पाटीजवळ आज (दि. 28) सायंकाळी साडेसातच्या सुमारास दोन दुचाकींची समोरासमोर जोरदार धडक होऊन तिघांचा मृत्यू झाला, तर एक तरुण गंभीर जखमी झाला आहे. या घटनेमुळे परिसरात हळहळ व्यक्त करण्यात येत आहे.
मिळालेल्या माहितीनुसार, हातोला येथील अभय सतीश चव्हाण (वय – 25) आणि ऋषिकेश अशोक चव्हाण (वय – 21) हे दुचाकीवर बर्दापूरहून हातोलाकडे जात असताना लिंबगाव पाटीजवळ त्यांच्या दुचाकीची समोरून येणाऱ्या दुसऱ्या दुचाकीशी जोरदार धडक झाली. या भीषण अपघातात अभय चव्हाण यांचा जागीच मृत्यू झाला, तर ऋषिकेश चव्हाण गंभीर जखमी असून त्याच्यावर येथील ‘स्वाराती’ रुग्णालयात उपचार सुरू आहेत. दरम्यान, समोरून येणाऱ्या दुचाकीवरील दोघेही तरुण या अपघातात जागीच ठार झाले आहेत. त्यांची नावे अद्याप स्पष्ट होऊ शकलेली नसली, तरी ते पानगाव येथील असल्याची माहिती सूत्रांनी दिली आहे.
या अपघाताची माहिती मिळताच बर्दापुर पोलिसांनी घटनास्थळी धाव घेतली असून, पुढील तपास सुरू केला आहे. अपघाताचे नेमके कारण अद्याप समजू शकले नाही. स्थानिक ग्रामस्थांच्या मदतीने जखमींना तात्काळ रुग्णालयात दाखल करण्यात आले आहे.
